Luo Migu Wanörö Tödö Santo Fetero ba Faulo, Rasul |Minggu, 29 Juni 2025|

 

Fombaso I     : Halöwö Rasul 12:1-11

Fombaso II    : 2 Timoteo 4:6-8.17-18

Injil                 : Matai’o 16:13-19

 

Turia Somuso Dödö khö Yesu Keriso nisura Yohane.-

 

Me luo da'ö, Irugi Yesu danö ahatö mbanua Kaisaria Wilifi. Ba da'ö Isofu khö ndra nifahaöNia, Imane : "Molo'ö fanguma'ö niha, haniha Nono Niha andrö ?"- Latema li ira nifahaö Yesu, lamane : "So zanguma'ö Yohane same'e fanasa; so zanguma'ö Eliya;- ba so göi zanguma'ö Yeremia ma zui samösa ba gotalua ndra sama'ele'ö." Isofu khöra Yesu : "Molo'ö ya'ami, haniha Ndra'odo andre ?" Itema li Simoni Fetero, imane : "Keriso – Nibayoini andrö sa Ndra'ugö, Ono Lowalangi sauri." Itema linia Yesu, imane khönia :
"Tefahowu'ö Ndra'ugö, Simoni ono Yona, me tenga niha zama'ele'ö khöu da'ö, - no AmaGu andrö si so ba zorugo.- Ya'odo göi Uŵa'ö khöu : Fetero – Gowe saro ndra'ugö. Yaŵa ba dete gowe andrö Ufasindro GerejaGu andrö dania. Gowe andrö, ba tebai ni'alani, he fa'amate, he narako. Ube'e dania khöu nono kusi gamatöröŵa Lowalangi andrö. Hadia nitenaŵau ba gulidanö, no nitenaŵa göi ba zorugo. Ba hadia ni'atulö'öu ba gulidanö, no ni'atulö'ö göi ba zorugo." Aefa da'ö Ifangelama ndra nifahaöNia, ena'ö böi la'ombakha'ö gofu ha'ökhö, wa Ya'ia Keriso.-

 Simanö duria somuso dödö khö Zo'aya ya'ita, Yesu Keriso.-

 FA’ARO DÖDÖ BA WAMADUHU’Ö BA BA WANURIAIGÖ 

Samuza ma’ökhö, so samosa niha sifaduhu tödö khö Yesu wa lö iröi ia Yesu na itörö ia fanandraigö. Tandra khönia ya’ia da’ö, lö tebulö so dombua fasa lahe wofanö; safasa lahenia ba safasa lahe Yesu. Ba hiza saluania, na ero itörö fanandraigö niha andre, ha safasa lahe ni’ilania ba iwaö tödönia wa lahenia ya’i da’ö. Ba zimanö kumökö ia khö Yesu wanguma’ö: “He tua, hawa’öröi ndra’o na ero itörö ndra’o fanandraigö?” itema linia Yesu imane: “He nogu, lö niröigu ya’ugö na itörö ndra’ugö fanandraigö. Lahe si safasa andrö ni’ilau ba no lahegu da’ö, me no Ulu’i ndra’ugö na so wanandraigö andrö”.

Ba ngaluo andre tatörö tödöda Santo Fetero ba Faulo si no rasul sanuriaigö andrö. Ya’ira sidarua andre asese sibai lafangai börö me ya’ira andre no niha sanuriaigö Turia Somuso Dödö sifao simane ira Rasul tanö bö’ö. Ha’awai ya’i, Rasul Fetero andre no zondrönia’ö ira Rasul ba wanuriaigö turia somuso dödö si no ihonogöi Yesu samösa simane si no tarongo bakha ba duria somuso dödö andrö nisura Matai’o. Hewa’ae lö sifalukha boto ira Yesu, Waulo andrö, ba hiza no ikaoni göi ia Yesu ba wanuriagö turia somuso dödö andrö ba soi sebua misa.

Ya’ira sidarua andre, no la’oroma’ö hewisa wanaögöra famakao ba wanuriagö Keriso andrö si no tötönafö niha samati fefu. Fetero andrö nikuru, I’efa’ö sa’atö ia Mala’ika moroi ba wamakao razo Herode (fombaso si sara). Simanö göi Waulo, si no labe’e ba gurunga andrö, lö mamalö aro dödönia wa So’aya zi lö mamalö mango’awögö ya’ia (fombaso si dua). Börö wa’aro dödöra andrö ba khö Yesu, lö mamalö Ifasindro Gereja-Nia andrö So’aya. Gereja andrö no simane gowe sitebai ni'alani, he fa’amate ba he göi narako.

Moroi ba zalua khöra andre sidarua, ba zimanö göi tola tabali’ö ia khöda dumaduma ya’ita niha samati. Dumaduma sedöna tahalö khöda ya’ia wa’aro dödö. Yesu zanofu khöda zamösana; “Molo’ö ya’ami, haniha Ndra’odo andre?” Fanemada li ba wanofu Yesu andre, no böröta wa’aro dödö si so khöda. Fa’aro dödöda khö Yesu andre, modanedane ia ba wangi’ilada Ya’ia. Fangi’ilada haniha Yesu no sambua fangaro dödöda wa lö mamalö fariawö ia khöda. Ba zimanö aro dödöda ba wanuriaigö Ya’ia ba lala wa’aurida.

Fe’aso ba gurunga simane salua khö ndra rasul andrö, tola göi tarasoi ia ba lala wa’aurida sero ma’ökhö. Kurungada zamösana ba ya’ia lala halöwöda, ba wangalui fangorifi mboto. Na faduhu dödöda wa lö faröi khöda Yesu, lö mamalö tetoloni ita. Hewa’ae sasesenia simane nidunödunö mege ba ziföföna, tawalinga no iröi ita, ba hiza lö aboto ba dödöda wa fao Ia awöda. Data’a’aro’ö dödöda khö-Nia, ba zimanö tetoloni it aba wa’auri andre, irugi mangawuli ita dania ba zorugo. Amen. (Ditulis oleh Kat. Ingatan Sihura, S.Ag)