Luo Migu Biasa – 17 | Inspirasi Kotbah dalam Bahasa Nias | Minggu, 27 Juli 2025

 

(sumber: google)

Luo Migu Biasa – 17

Fombaso I    : Kejadian 18:20–32

Fombaso II   : Kolose 2:12–14

Injil               : Lukas 11:1–13

 

Turia Somuso Dödö khö Yesu Keriso nisura Yohane.-

Me luo da'ö, Ilau mangandrö Yesu ba zi sambua nahia. Me no aefa mangandrö Ia, samösa ba gotalua ndra nifahaöNia, sanguma'ö khöNia : "He So'aya, fahaö ndra'aga ba wangandrö, simane Yohane same'e fanasa samahaö ira nifahaönia wangandrö." Imane khöra Yesu : "Na mangandrö ami, mimane :

He Ama ! Ya la'amoni'ö döiMö fefu niha. ya tohare gamatöröŵaU.

Be'e khöma gö soguna ero ma'ökhö. Be'e aefa khöma horöma.

Ya'aga sa göi ma'efa'ö zala ba niha fefu si no fasala khöma.

Ba böi tehegö göna ndra'aga fanandraigö."

Ba Imane Yesu khö ndra nifahaöNia : "Na so ba gotaluami zi möi ba nomo nawönia ba zi talu mbongi, ba imane khö nawönia andrö : He talifusö, be'e nifalaligu roti ma'ifu, ha tölu ngawua. Noa sa möi khögu niha si fahuwu khögu i'otarai kumoli, ba lö hadia ia khögu, önia. Hadia iŵa'ö dania moroi si bakha : Böi busi dödögu, noa sa mukusi mbawandruhö. No sa'ae mörö ba ngaigu ndraonogu. Tebai maosodo, ba wame'e khöu ni'andröu. Uŵa'ö khömi, he lö'ö göi ibe'e khönia, ba lö maoso ia, ba me si fahuwu khönia ia, ba maoso ia sa'atö, me iforege wangandrö, ba ibe'e khönia, hadia ia zoguna khönia. Börö da'ö : Mi'angandrö, ba tebe'e khömi. Mi'angalui ba misöndra. Mibököbökö mbawandruhö, ba tebokai. Dozi sangandrö, ba itema; sangalui, ba isöndra; khö zamökömökö bawandruhö, tebokai khönia. Ba haniha ba gotaluami zatua, same'e khö nononia gara, na i'andrö roti, ba same'e ulö, na i'andrö gi'a ? Ba ma zui same'e tongo, na i'andrö gadulo manu ? Gofu hewisa wa'a-lö-sökhimi, ba mi'ila sa'atö mibe'e zi sökhi ba ndraonomi. Ba lö mendrua manö Namami si so ba zorugo zangila wame'e Eheha Ni'amoni'ö ba niha sangandrö khöNia ?"-   

 Simanö duria somuso dödö khö Zo'aya ya'ita, Yesu Keriso.-

 

 FANGANDRÖ SI’OROI DÖDÖ BA MOFA’ABÖLÖ

 So sambua gamaedola si sökhi sibai wamondrongo, mendrua manö göi geluaha gamaedola andrö. Imane amaedola andrö: “Na si’oroi dödö tö wowengu, na si’oroi dödö tö we’e, alua yaŵa daŵa hörö ana’ate. Na tenga tö si’oroi dödö tö wowengu, na si’oroi dödö tö we’e, ba alua sibai yawa daŵa hörö, mane sibai gitö gae.” Amaedola andre sökhi sibai geluahania me moroi ba gamaedola andre tefaduhu’ö khöda wa famalua hadia ia andrö sökhi na si’oroi sibai ba dödö. Tandra wa si’oroi ba dödö dania lala halöwö andrö, ba oroma ia ba wangodödögö wamalua lala halowö andrö.

Bakha ba duria somuso dödö tarongo hewisa me ifaha’ö ndra nifaha’önia Yesu ba wangandrö. Fangandrö nifaha’öNia andrö ba no fangandrö sasese sibai ta’angandröi, ya’ia wangandrö “He Ama Khöma”. Bakha ba wangandrö andre sindruhu oroma wa’ahatö zi samösa niha khö Lowalangi ba ba nawönia niha. Oroma da’e ba wogaonida andrö “Ama” khö Lowalangi. Ba wangandrö andre göi oroma hewisa wamalua fangandrö andrö tenga ha ba wehede ba hiza i'o’ö buabua. Oroma da’e ba wangandö wanguma’ö “Efa’ö khöma horöma, simane fangefa’öma ba niha si fasala khöma”. Ba da’e göi oroma wa’ahatöda andrö ba nawöda niha.

Dumaduma wangandrö si’oroi dödö andrö, ya’ia wangandrö Gaberahamo andrö ba wombaso siföföna. Lö aetu I’andrö khö Lowalangi ena’ö Ihakhösi tödö Zodoma fabaya Gomora andrö. Ibe’e dödönia Aberahamo mbanua Zodoma fabaya Gomora andrö, tenga börö wa so gohitö dödönia ba mbanua andrö. Ba hiza ifalua da’ö no sitobali bua wamati ba fa’ahatönia khö Lowalangi. Da’e mbua wamati andrö niwa’ö Waulo ba mbanua Golose. Bua wamati ba fa’ahatö khö Lowalangi andrö, mowua ba oroma ia ba wangobadödöi ba ba wangomasi’ö awö.

Ba luo migu andrö göi, Gereja ma’asambua, nidönia’ö namada Paus Leo XIV, tatörö tödö ngaluo Dua ba Awe (Kakek Nenek). Tua ba awe andre no niha sebua fa’omasi si tebai tasulöni. Moroi khöra göi tafaha’ö ita ba wamalua famati, fanötöna ba fa’omasi. Da’e göi ni’oroi’ö Nama Paus Leo XIV, ena’ö lö aetu so khöra wamati, fanötöna ba fa’omasi. Andrö moguna göi ta’obadödöi ira andrö, me moroi ba khöra göi andrö so mbuabua simane ni’oroma’ö Gaberahamo andrö. Faduhu sibai dödöda, me asese lafangelama ita wanguma’ö, “Böi tafe’e dödö zatua. Na me’e dödö zatua, ba na mangandrö ia, irugi dödö Lowalangi.” Amen. (Ditulis oleh Kat. Ingatan Sihura, S.Ag)