Luo Migu Biasa – 14 | Inspirasi Kotbah dalam Bahasa Nias | Minggu, 06 Juli 2025

 

(Sumber Poto: Google)

Fombaso I     : Yesaya 66:10-14a

Fombaso II    : Galatia 6:14-18

Injil                 : Luka 10:1-9

 

Turia Somuso Dödö khö Yesu Keriso nisura Yohane.-

 Me luo da'ö, Ifili So'aya fitu ngafulu nifahaöNia ba wamatenge ya'ira, darudarua, ba wowaöwaö fönaNia, ba mbanua sebua ba ba mbanua side'ide fefu, ba zi möi Ia dania. Imane khöra : "Ebolo sa mbasitö andrö, ba lö atoto zo halöŵö. Andrö mi'andrö khö Zokhö nowi andrö, ena'ö Ifatenge niha sangowuloi bua nowiNia. Miae'e ! Hiza, Ufatenge ami, hulö nono mbiribiri ba hunö nasu gatua. Böi mi'ohe gofekofe ba ma kandrekandre ma zui badagahe. Böi tetaha ami ba wangowai niha ba lala. Na möi ami yomo ba zi sambua omo, ba da'ö zi föföna miŵa'ö : Ya falukha wa'ohahau dödö zi sambua omo andre. Ba na so ba da'ö niha sinangea wanema fa'ohahau dödö, ba ahono khönia wa'ohahau dödö andrö moroi khömi; ba na lö'ö, ba mangawuli ia khömi.

Mi'iagö manö zi sambua omo. Mi'a manö, hadia nibe'era khömi; noa sa sinangea itema zulö sohalöŵö. Böi mifa'ema'ema nomo moroi ba zi sambua omo numalö ba nomo bö'ö.

Na möi ami ba zi sambua banua, ba na latema ami, mi'a hadia nibe'era khömi. Mifadöhö wökhö zofökhö ba mbanua andrö ba mimane khöra : Iada'e Ifasindro gamatöröŵaNia Lowalangi ba gotaluami."-   

 Simanö duria somuso dödö khö Zo'aya ya'ita, Yesu Keriso.-

 

FA’OMUSO DÖDÖ BA WE’AMÖI ENONI TEBAI NISU’A

 Samuza ma’ökhö, so samösa nina si so ono matua, da siwa wa’ato. Inada andre, lö aetu möi ia ba gosali ero inötö. Manötöna sibai dödö ninada andre ena’ö ero luo migu so gere samasömba’ö Ekaristi ba tola na’atö itema komuni. Me irugi inötö Luo Migu Wogaoni (Luo Migu Panggilan), i’oigö sibai dödönia wangandrö inada andre ena’ö ikaoni Lowalangi zitobali enoni-Nia simöi Pastor, Suster, Frater, Katekis, ba tanö bö’önia na. Sifao sato, I’ebua’ö linia inada andre imane: “He So’aya, hawa’omuso dödöma na ökaoni moroi ba gotalua soi-Mö andre zitobali Ere, biarawan-biarawati, ira Katekis, simöi manuriaigö taroma li-Mö. Na tola Ama, kaoni nono ndra talifusö andrö, ba böi onogu ua, me oya lala halöwögu nasa ba nomo”.

Moroi ba zalua andre, tola sibai möi ma’ifu fama’igida me inada andre no toröi dödönia nasa ba halöwönia ba nomo ba tenga lala halöwö ba khö Lowalangi. Andrö dania ba lala halöwö andrö khö Lowalangi, tarongo wehede Yesu wanguma’ö: "Ebolo sa mbasitö andrö, ba lö atoto zo halöŵö”. Alua wehede Yesu andrö, tenga lö börö. Ba hiza alua wehede Yesu andrö börö me oya nasa zimane inada andre sitoroi dödö, ma si no mamalögu tödönia nasa ba halöwö nomo ma halöwö gulidanö.

Na tahaogö ta’erönusi, hadia moguna halöwö gulidanö? Tatu tamane wanguma’ö: “Moguna göi da’ö”. Fa’amoguna nösi gulidanö tebai ta’osilö’ögö, me fa’aurida andre nasa tou ba gulidanö, lö aefa moroi ba nösi gulidanö. Hewa’ae simanö, famatenge Yesu andrö ira nifaha’ö sidarudarua, tenga manö ha ba mbanua sebua, ba hiza so göi ba mbanua side’ide. So mbanua sanema’ö ba so zi lö’ö. Fefu da’ö no lala gofanöwa niha si so ba gulidanö. Ba hiza moguna ine tabe’e ba mbörö dödöda, wa ba we’amöi enoni andrö tatema zulö simane niwa’ö Yesu: “No sinangea sa itema zulö sohalöwö”.

Moroi ba wamatenge Yesu andre, tola ta’erönusi tödöda zamösana wa siföföna sibai aboto ba dödöda wa ya’ita andre no enoni-Nia nifatenge ba nowi-Nia, ya’ia lala halöwöda zamösana. Ba lala halöwöda andrö taturiaigö daroma li-Nia andrö sifao fa’owuawua dödö. Moroi ba wa’owuawua dödö andrö mangele dania gumbu howuhowu, fa’ohahau dödö, ba fa’auri si lö aetu. Da’e Yerusalema andrö nidunödunö Yesaya ba wombaso si föföna. Moguna ta’omusoi’ö dödöda ba Yerusalema andrö si no nahia wohalöwöda ba nahiada wanuriaigö turia somuso dödö.

Simendrua zedöna ta’erönusi ba ya’ia da’ö, wa ba wanuriaigö andrö tenga zi lö fa’afökhö ba fa’akao. Folohe gofekofe manö ba Itenawa Yesu. Hewa’ae simanö, na so niha sanema’ö ba ba da’ö mu’iagö, ba na so nibe’e buala ma balazo da’ö ni’oguna’ö. Da’e röfa andrö niwa’ö Waulo ba mbanua Galatia. Moroi ba röfa andrö sa dania mangele wa’ohahau dödö ba fa’auri si lö aetu.

Ba gafuriata, fanuriaigöda taroma li andrö oroma ia ba wehededa, ba gamuatada ba ba wolo’öda oroisa Lowalangi. Ba wolo’öda ba ba wanuriaigöda taroma li Lowalangi andrö tenga ena’ö simöi fangebua’ö töida, ba hiza i, simöi fangebua’ö töi Lowalangi. Da möi ita enoni Lowalangi andrö sifao fa’ahele dödö ena’ö basitö sebolo andrö tola te’owuloi ba halasa zokhö nowi. Amen. (Ditulis oleh Kat. Ingatan Sihura, S.Ag)