Luo Migu Biasa – 18 | Inspirasi Kotbah dalam Bahasa Nias | Minggu, 03 Agustus 2025

 

(sumber foto: google)

Luo Migu Biasa – 18

Fombaso I     : Sangombakha 1:2;2:21-23

Fombaso II    : Kolose 3:1-5.9-11

Injil                 : Lukas 12:13–21

 

Turia Somuso Dödö khö Yesu Keriso nisura Yohane.-

 Me luo da'ö, so samösa ba gotalua niha sato, sanguma'ö khö Yesu: "He Guru, ŵa'ö khö ga'agu, ena'ö ibe'e khögu ösa harato niröi zatuama khöma." Imane khönia Yesu : "He talifusö, haniha zamataro Ya'o tobali sanguhuku ba wombagi harato khömi ?"Awena Imane Yesu ba niha sato si so ba da'ö : "Mi'angenanöi ba mi'angelamaisi wa'omasi ba gana'a andrö. Börö me fa'auri niha tenga moroi ba haratonia andrö, he ŵa'ae fahöna haratonia." Ba Iŵa'ö khöra gamaedola, Imane : "So samösa niha sikayo, sokhö tanö si sökhi, same'e bua soya sibai. Mangerangera niha sikayo andrö, imane dödönia : Hadia nasa nilaugu iada'e ? Lö hadöi khögu nahia sa'ae wangirö'ö bua nowigu. Mangerangera ia zui, imane bakha ba dödönia : Da'ö ulau : Ufadudugö'ö halasagu, ba segebua moroi ba da'ö ufazökhi. Ba da'ö u'owuloi dania mbua nowigu ba fefu haratogu tanö bö'ö. Awena umane ba dödögu : No fahöna khöu mbalazo, ya'ugö tödögu, hame'uga fakhe lö ahori. Honogö'ö, lau mangamanga ba badubadu hadia ia ba omusoi'ögö ! Imane khönia Lowalangi : He niha sambö era'era ! Bongi andre mate ndra'ugö. Ba ha'ökhö möi fefu wa'akayo si no ö'owuloi andrö ?" Ba Imane Yesu : "Simanö lala zangowuloi khönia harato gulidanö, ba si lö mangowuloi khönia harato ba khö Lowalangi."-   

 Simanö duria somuso dödö khö Zo'aya ya'ita, Yesu Keriso.-

 

MANGALUI ÖSI GULIDANÖ SIFAO FA’ATUATUA

So sambua dahödahö sasese sibai lafatahö’ö meföna. Dahödahö andrö ya’ia: “heza zi’oföna ia manu ma adulo”. Ato sibai zamadönidöni dahödahö andre hadia mbörö me adulo andrö so ia moroi ba manu, ba manu göi andrö mamoto ma so ia moroi ba gadulo. Ba zimanö dahödahö andre ba lö göi i’ila aetu. Ba hiza afuriatania tola lamame: ha adulo manu zi so, ba lö manu adulo.

Dahödahö andre faudu sibai göi ia ba nösi wombaso andre nirongoda ba luo migu andre. Hadia mbörö, taroma li zango’ou ya’ita ba ngaluo andre, ena’ö harato zorugo nihöna ba tenga harato gulidanö. Na ba lala wa’auri si’ero ma’ökhö, tebai göi taheta ita ba wehede sanguma’ö: “fasindrosindro döwa si lö ösi ba lö i'ila sumindro”. Ba da’e tatu mangerangera ita, na simane heza zindruhunia ni’aluida andre?

Bakha ba wombaso si sara nihalö moroi ba zura Zangombakha andrö, sindruhu ifaduhu’ö khöda hewisa zangokhögö ösi gulidanö andrö. Okhöta, fa’akayo, kefe, omo, fangi’ila ba sekola salaŵa, oi sebua böli ba höröda niha gulidanö. Ba hiza, fefu da’ö oi tola taya manö. Ya’ita samösa ba tenga si’ogötö’ö. Fefu nösi gulidanö andrö no buala Lowalangi ba niha, ba ha soguna ba zi sabata ita.

Ba wombaso sidua itugu ifahatö khöda Faulo, hewisa niha andrö sangokhögö ösi gulidanö. Ba wangokhögö ösi gulidanö, tola manö alua ngawalö mbuabua samunu fa’omasi ba dödö niha. Fefu hadia ia, ba ya’ita samösa tenga si’ogötö’ö ba samuza ma’ökhö mate. Ba hiza so gulidanö si bohou, si yefo ba zi tambai gulidanö andre. Ba we’amöi ba gulidanö andrö, te’andrö khöda, ena’ö tabulö’ö lala wa’aurida. Famulö’ö lala wangerangera andrö, ya’ia wangoguna’ö ösi gulidanö sifao oroisa Lowalangi. Ba wangoguna’ö andrö, ya’ia na lafalua ia sifao fa’omasi. Ba wamalua fa’omasi andrö, no tafatoutou tödöda nösi zorugo andrö ba tenga ha ösi gulidanö.

Bakha ba duria somuso dödö , idunödunö khöda i'andrö khöda Yesu harato ba khö Lowalangi andrö ta’owuloi sitola möi fangorifi no so irugi zi lö aetu. Moguna göi nösi gulidanö ba wanundreheni lala halöwö ba khö Lowalangi. Fangalui harato gulidanö andrö moguna, ba hiza böi iböbö dödöda ba olifu wangandrö saohagölö. Ba gafuriata moguna tafati wehede bö’ö sanguma’ö: “Mi’ofönai’ö wangalui banua Lowalangi andrö awö wa’atulö dödö, ba hiza tebe’e dania fefu danö bö’ö andrö sitobali nönönönö” (fahela Matai’o 6:33). Amen. (Ditulis oleh Kat. Ingatan Sihura, S.Ag)