Luo Migu Hari Raya Kemerdekaan Indonesia | Inspirasi Kotbah dalam Bahasa Nias | Minggu, 17 Agustus 2025

 

(sumber: google)

Luo Migu Hari Raya Kemerdekaan Indonesia

Fombaso I    : Sirakh 10:1-8

Fombaso II   : 1 Fetero 2:13-17

Injil               : Luka 19:11-28

 

Turia Somuso Dödö khö Yesu Keriso nisura Luka.-

Me luo da'ö, me no ahatö Yesu ba Yerusalema, ba me lawai i'anemai'ö to'ele gamatöröŵa Lowalangi andrö niha sato, ba Ilau gamaedola, Imane : "So zofanö, - salaŵa, - isaŵa danö saröu, ena'ö tobali razo Ia ba da'ö, ba mangawuli dania. Humede ia khö ndra enoninia, dafulu, ibe'e khöra zi fulu balaki, imane khöra : 'Milau ba waniaga, irege mangawulido'. Ba no fatiu dödö mbanuania khönia, ba lafatenge zinenge solo'ö ya'ia, lamane : 'Lö edönaga salaŵama da'ö'. Ba me mangawuli ia, me no tobali razo ia si yefo, ba ifakaoni'ö genoni-nia andrö, nibe'enia ana'a, ena'ö irongo he lawisa wolau. So zi föföna, imane : 'He ama, fulu balaki hare si samba fondruyu andrö khöu'. Imane khönia : 'Lau, enoni si sökhi ! Me lö si faröi ndra'ugö ba zi lö oya'oya, ya so barö mbawau zi fulu banua'. Ba so wanete da'ö, imane : 'Si samba fondruyu andrö khöu, ama, ba no mohare, lima balaki. Ba imane göi ba da'ö : “Ba ya'ugö göi,  ya so barö mbawau zi lima banua'. Ba so zi samösa, imane : 'Ya'e zi samba fondruyu khöu, ama, no u'irö'ö ba zaefutanga. Noa sa ata'udo ndra'ugö, me no sabe'e huku ndra'ugö, me öhalö zi tenga nibe'eu, ba me öbasi zi tenga nitarumö'. Imane khönia : 'Moroi ba mbeweu uhuku ndra'ugö, enoni si lö sökhi. Hadia no ö'ila wa sabe'e huku ndra'odo : mangaido ba zi tenga nibe'egu, ba mamasido ba zi tenga nitarugu ? Ba hana wa lö öbe'e ba zamalali gana'agu andrö ? Ba ya'o, na sodo, ba uhalö fabaya hare ena'ö.' Ba imane ba zi so ba da'ö : 'Mihalö khönia zi samba fondruyu andrö ba mibe'e ba zi so fulu balaki'. Lamane khönia : 'He ama, no fulu balaki khönia'. Ba imane : 'Uŵa'ö khömi, dozi ba zi no so, ba tebe'e, ba khö zi lö'ö, ba lahalö göi zi no so khönia. Ba si fatiu tödö andrö khögu, si lö edöna salaŵara ndra'odo, mi'ohe ba da'e, - ba mibunu ira fönagu'." Ba me no Iŵa'ö da'ö Yesu, ba mofanö Ia, Isaŵa misi yaŵa Yerusalema.-

 Simanö duria somuso dödö khö Zo'aya ya'ita, Yesu Keriso.-

 FA’AHETA MOROI BARÖ MBAWA WANGOSAWUYU

 Ero’ero röfi, ba zi fele witu mbawa si ŵalu, tatörö tödöda ngaluo wa’aheta soi Indonesia andre moroi barö mbawa wangosawuyu soi bö’ö. Fa’aheta moroi barö mbawa wangosawuyu andrö, no nifadöni sifao noso ba boto ndra furugöda moroi ba soi sangosawuyu. Ohitö dödöra ba no sökhi sibai me omasi ira na ya’ita andre iraonora ma nga’ötöra mitou, lö saae omasi ira na so göi ita barö mbawa wangosawuyu, ba hiza i, ena’ö sindruhu tola ta’ofanöi wa’aurida faudu molo’ö fa’abölöda ba fa’atuatuada zamösana.

Na tahaogö ta’osisi’ö lala gofanöwa soida andre Indonesia, tola tamane duhu, no aefa ita moroi ba wangosawuyu soi tanö bö’ö. Ba zimanö ta’andrö saohagölö ba tasuno göi wa’ahakhö dödö Lowalangi ba zimanö. Ba zitambai da’ö i, oya manö nasa zanguma’ö, duhu wa no aefa ita moroi barö mbawa wangosawuyu soi bö’ö, ba hiza iada’a tarasoi göi we’aso barö mbawa wangosawuyu soida samösa. Asese sibai la’oguna’ö wehede Presiden Siföföna ya’ia Sukarno wanguma’ö: “Aoha sibai halöwögu, ha famoloi soi bö’ö sangosawuyu ya’ita. Ba hiza sabua dania halöwömi wolawa ono mbanuada samösa”. Alua wehede andre me, oya manö nilau zamötörö, fa’itaria faudu ba asese göi simöi fangabu dödöda. Ba da’ö, oya manö wamadömadöni nono mbanua, irege fa’itaria lö ohahau dödöda wamaigi.

Fanörö tödöda ngaluo wa’aheta soi Indonesia andre moroi barö mbawa wangosawuyu, no sa’ae walu ngafulu fakhe wa’ara. Na boto wa’aniha zimane ba no sa’ae ibörögö abögubögu, itugu atuatua ba itugu bihasa fangerangera. Fefu da’ö no oi sinagea ta’andrö saohagölö khö Lowalangi ba tasuno wa’ahakhö dödöNia. Ba zitambai da’ö moguna manofu göi ita ba dödöda zamösana: “Hadia göi zinangea tobali fanoloda ba wanörö tödö ngaluo si sökhi andre?”

Duhu no I’a’asogö gölia ulidanö andre Lowalangi, ba no ifataro göi ndra samatörö sitobali tohu danga. Fefu da’ö mo’ohitö dödö ena’ö fefu nono wobanua tola sökhi  lala wa’aurira ba so ira ba wa’ohauhau dödö. Alua da’e na sökhi zololohe ba solo’ö göi nidönia’ö. Na lö’ö ba oi sitekiko lala wa’auri. Ba da’e moguna wa faoma manundreheni lala halöwö nono wobanua ba samatörö. Andrö dania wa aboto ba dödöda niha si no aheta moroi barö mbawa wangosawuyu andrö, ya’ia niha samalua lala halöwönia faudu molo’ö noronia zamösana. Ifalua fefu halöwö andrö sifao fa’ahele dödö. Falulusa fohalöwö andrö timba gana’a andrö si sambua fondruyu. Na sökhi wangehao ba sitedou, ba na lö sökhi wangehao ba sawuwu furi. Da’e ni’andrö Yesu khöda ena’ö lö tafamalö ta’andrö saohagölö wa’akhö dödö Nama ba talulu göi ita wanundreheni banua ba soida. Na sökhi wanundrehenida ba sitedou ita, ba na lö sökhi wanundrehenida ba sawuwu ita. Amen.  (Ditulis oleh Kat. Ingatan Sihura, S.Ag)