Luo Migu si-22 | Inspirasi Kotbah dalam Bahasa Nias | Minggu, 31 Agustus 2025

 

(sumber: google)

Fombaso I     : Sirakhi 3:17-20.28-29

Fombaso II    : Heberai’o 12:18-19.22-24a

Injil                 : Luka 14:1a.7-14

 

Turia Somuso Dödö khö Yesu Keriso nisura Luka 

Me luo da'ö, möi Yesu ba nomo zalaŵa warizai'o manga. Lahaogö sibai wangosisi'ö Ya'ia niha si so ba da'ö. Me no Ifaigi, wa lafahulö naha nifosumange ira tome, Ibe khöra wamahaö, Imane: "Na lakaoni ami ba walöŵa, böi midadao ba naha nifosumange. Börö ma so nikaoni niha andrö sabölö nifosumange moroi khöu. Börö da'ö, i'ondrasi ndra'ugö sogaoni ya'ami andrö ba imane khöu: Bologö dödöu, so dome sangiagö naha andre. Awena si fao fa'aila möi ndra'ugö mudadao furi. Na lakaoni ami ba watomesa, abölö sökhi na mudadao ami ba nahia tanö furi. Ena'ö na i'ila ndra'ugö sokhö omo andrö, imane khöu: Fa'ese'ö ba naha sabölö sökhi andre, talifusö! Awena tefosumange ndra'ugö föna dome bö'ö andrö fefu. Börö me fefu niha sangebua'ö ya'ira, da'ö ni'ide'ide'ö dania. Ba niha sangidengide'ö ya'ira, da'ö Ifolakhömi dania Lowalangi." Aefa da'ö Imane Yesu khö zokhö omo sogaoni Ya'ia ba watomesa: "Na ökaoni niha wemanga ba zilaluo ma ba zibongi, böi kaoni ndra si fahuwu khöu ma ira talifusöu ma si tenga bö'ömi ma si fahatö omo khömi sikayo. Börö me lakaoni göi dania ndra'ugö ba ötema zulö. Na fatome ndra'ugö, kaoni niha si numana, niha sagaböda, niha sombuyumbuyu ba niha si lö hörö. Tefahowu'ö ndra'ugö, börö me tebai lasulöini dania khöu wa'asökhi dödömö andrö. Lowalangi dania zanulöni khöu fa'asökhi dödömö andrö, ba ginötö te'orifi mangawuli niha satulö andrö."-  

Simanö duria somuso dödö khö Zo'aya ya'ita, Yesu Keriso.-

 

FANGIDENGIDE’Ö TANDRA NIHA SAMATI 

So dombua maedomaedo sasese sibai la’oguna’ö satua föna. Maedomaedo andrö ya’ia huwa go’o ba ngalai wakhe. Huwa go’o andrö ba no bagabaga, no mosindro ba ba gafuriatania, i’oloi’ö angi. Ngalai wakhe andrö, ba no a’uzö’uzö, no andrö ba na atoru ia, aekhu ya’i ba mbörönia. Asese lafake wamaedo andre satua föna ba wanegu iraono si töra fa’akaliru, ba tötönafö zatua ena’ö hulö simane fakhe andrö, itugu mo’ösi ba itugu molo’ö, tenga itugu mukawa misa.

Taroma li Lowalangi nirongoda ba ngaluo migu andre, idönia’ö ita ba wangidengide’ö ya’ita tanö föna Lowalangi ba tanö föna niha. Lö guna ta’alui lakhömi wa’aniha, mendrua manö ba wangalui fanuno moroi ba niha. Hiza i, töra moroi ba da’ö i'andrö khöda Yesu ena’ö ta’agö nahia tanö furi andrö ba na mamuala ita ena’ö ba niha si lö tola manulöni khöda hadia nifaluada khöra. Me ba zimanö tefolakhömi ita, ba tenga moroi ba niha tasöndra lakhömi andrö ba hiza no moroi khö Lowalangi samösa.

Fanofu khöda zamösana, hewisa ita wamalua fangidengide’ö andrö föna Lowalangi ba föna niha? Yesu ono Zirakhi andrö ba zurania tasöndra wehede wanguma’ö “böwö si sökhi”. Böwö si sökhi andrö siföföna sibai oroma ia ba mbuabua, irege so ba gamaedola khöda zanguma’ö: “ha amuata nifaigi ba niha, ba ha buabuania nitöngöni”. Fa’asökhi gamuata ba buabua andrö, mosikhala ia ba wehede ba ba wahuwusa ba nawö.

Buabua simanö da’ö dania ba gafuriata tetötöi buabua niha samati. Da’ö zedöna ifa’ema ba wombaso andrö ba niha Heberai’o. Börö wolo’ö Ndraono Gizara’eli andrö dania wa latema zulö ya’ia wondrugira banua Lowalangi sauri andrö ba hili Ziona. Ya’ita göi si no soi nifili Lowalangi andrö si lö tola lö’ö ta’olohia’ö mbuabua fangidengide’ö andrö. Ba wolo’öda göi dania tasöndra wa’auri si lö aetu andrö. Ya lö mamalö, ena’ö famati ni’okhögöda andrö itugu simane fakhe andrö situgu mo’ösi ba itugu so khöda wangidengide’ö. Amen. (Ditulis oleh Kat. Ingatan Sihura, S.Ag)