BONGI PASKAH (MALAM PASKAH) SABTU, 19 APRIL 2025

 

(Sumber foto: google)

Fombaso I    : 1 Moz 22:1-18

Fombaso II   : 2 Moz 14:15-15:1

Fombaso III  : Yes 54:4a.5-14

Fombaso IV  : Rm 6:3-11

Injil               : Luk 24:1-12

 

PASKAH: FA’AWU’A MOROI BA ZOGÖMIGÖ NUMALÖ BA HAGA 

So sambua ngandroto wehede sasese tarongo na so zama’ema huhuo ba wa’amate, ya’ia da’ö: “Sökhi mbawa wa’amate moroi ba mbawa wa’atumbu”. Na mu’angeraigö ba wa’alio ngandroto wehede andre, tola lamane: lö fatema ba dödöda; hadia mbörö, börö me fa’amate andrö fa’abu dödö zi so. Ba hiza, ngadroto wehede andre, na mufaigi ia moroi ba wa’abakha wamati, no sambua fangoroma’ö hewisa wa’omuso dödö ba khö Lowalangi.

Ngandroto wehede sifaudu ba da’e, ba ya’ia wehede Waulo andrö sanandrösa ba gerönuada ba mbongi paskah andre. Faulo zanguma’ö ba niha samati ba mbanua Gorindro; “zayazaya gölö wamatida andrö na lö maoso Keriso” (1Kor. 15:17). Ngandroto wehede andre no fangaro dödö ba niha samati, wa fa’amate Yesu andrö ba döla röfa tenga afuriata wamati, ba hiza no böröta wamati sibohou. Fa’amate andrö ha ndrela wa’awu’a moroi ba mboto wa’aniha numalö ba mboto wa’alowalangi.

Paskah ba li Heberai’o, eluahania fa’awu’a ma fa’aefa. Ba ngawua wehede andre so ginötö nitalu’i ba so nahia niröi ba so nahia nisawa. Na ta’angeraigö ia ba gofanöwa ndraono Gizara’eli, paskah andrö lafo’eluaha fanörö tödö wa’aefara moroi ba danö wangosawuyu Ndrawa Misirai numalö ba danö amabu’ula andrö, tanö gana’ana. Ba da’ö tetandraigö wamati, i’onarai wamati Gaberahamo andrö, irugi Ndraono Gizara’eli andrö sawu’a nidönia’ö Moze. Da’e nirongoda ba wombaso si sara, si dua ba sitölu bongi andre.

Paskah andrö si ha fanörö tödö ndraono Gizara’eli, tebohouni wamo’eluaha ya’ia ba wa’amate Keriso andrö; ya’ia wa fa’amate andrö no te’alani, no awu’a Yesu andrö moroi ba wa’amate, no möi Ia ba wa’auri sibohou, fa’auri wa’alowalangi. Ba zimanö göi ya’ita niha samati, tefawu’a ita moroi ba wa’ogömigömi horö, numalö ba haga Keriso, ya’ia haga wa’a’ono Lowalangi. Ba zimanö moguna ta’omusoi’ö dödöda ba wanunö Haleluya.

Fanofu khöda iada’a, hadia no göi awu’a ita ba zito’ölö ya’ita? Hadia no tafawu’a ita moroi ba wönu ba nahönahö dödö? Ena’ö tola tarasoi wa’omuso dödö paskah andrö, moguna göi tawu’ai dödöda, buabuada, ba lala wangerangerada si lö faudu moroi ba zomasi Lowalangi. Hegöi ba wongambatöda, da ta’ohe wa’omuso dödö paskah andrö, ena’ö simöna göi ita awö Keriso ba wondrugi fa’auri si lö aetu. Amen. (Ditulis oleh Kat. Ingatan Sihura, S.Ag)