LUO ZUMAHA SEBUA (Jumat Agung) | JUMAT, 18 APRIL 2025 |

 

(sumber foto: google)

Fombaso I     : Yes 52:13-53:12

Fombaso II    : Heb 4:14b-16;5:7-9

Injil                 : Yoh 18:1-19:42

 

FA’AMATE YESU: TENGA FAMAKAO, NO FA’OMASI

Na mangaetungaetu zatua me föna, tötönafönia ena’ö fefu ndraononia so ba ngainia. Ba ndraononia sasese molawa ya’ia, ba siföföna lafalua ba lalau mangefa sala ba ngawalö golalöwa si no lafalua. Ba ndraono simöi dödönia buabua ba ba da’ö ibe’e fetuania. Ba zitambai da’ö göi, ibörögö wame’e menemene satua, ibagi mbenuania ba ndraononia, ba ifatunö fefu gokhötania ba he silalö dangania ba niha, mendrua tö na fo’ömö. Fefu da’ö ifalua satua, tenga börö wa’ebua gokhötania, ba hiza sitobali tandra wa’omasinia ba ndraononia, irege ba gafuriata ibe’e ba ndraononia wanohugö fefu da’ö. Andrö dania wa so gamaedola sanguma’ö: “omumu hasi eu, obou hasi firö. Hadia zi lö obou ba götö niha si sagötö, ya’ia wangomasi’önia talifusö”.

Fa’amate Yesu nitörö tödö ba luo zumaha sebua andre, no sambua turia sabu sibai dödö. Yesu si no Ono Lowalangi si lö horö andrö, itema wamakao, teforöfa, irege mate ba döla röfa. Fa’amate-Nia andrö no töra moroi ba wa’amate niha samarabu ma niha sebua horö. Hewa’ae simanö, itaögö fefu da’ö tenga soguna khö-Nia ma ena’ö lahöni Ia niha. Itaögö fefu da’ö börö wolo’ö somasi Nama, ba wangöhöli niha gulidanö. Faudu da’e molo’ö nifa’ema Yesaya sama’ele’ö andrö ba wombaso si sara.

No toua ba mboto wa’aniha, na lamane fa’amate andrö ba afökhö sibai. Yesu samösa si so ba mboto wa’aniha andrö göi, itörö Ia fa’ata’u, irege I’andrö: “He Ama, na so lala, ya mutalu’i Ndrao famakao andrö”. Hewa’ae simanö wa’ata’u-Nia, lö ibe’e ba zomasi ia Yesu. I’o’ö zomasi Nama irege Iwa’ö: “Ba böi ya itörö zomasi Ndra’o, ya alua zomasi Ndra’ugö”. Fehede safuria andre zanga’aro’ö Faulo ba wombaso si dua wanguma’ö wa Yesu andrö Ono Lowalang no Ere Sebua, si no mutandraigö ba ngawalö hadia ia fefu.

Ba wa’amate Yesu andrö oroma khöda hewisa wa’omasi Yesu andrö ba we’amöiNia enoni. Fe’amöiNia enoni andrö sindruhu itörö wa’afökhö fa’akao. Teböbögö khönia zi lö atulö, ba hiza itema’ö da’ö fefu börö gohitö dödö Lowalangi ba wangoroma’ö fangöhöli andrö. Ba zimanö lö mamalö tefaduhu’ö wa’omasi sebua andrö. Fa’omasiNia andrö irugi ba itehe mate ba döla röfa. Ba gafuriata fa’amate Yesu andrö no tenga famakao, ba hiza no tandra wa’omasi si’oroi Lowalangi ba wangöhöli niha gulidanö.

Afuriata, fa’amate Yesu andre idönia’ö ita ena’ö böi aiwö ita ba wamohouni amakhaitada andrö khö Lowalangi ba he göi ba nawöda niha. No ibe’e khöda dumaduma wolo’ö-Nia famakhoi Nama, töra ia moroi ba menemene zatua sarakhagö mate andrö. Ba zimanö moguna tafareso dödöda, hadia no göi ta’o’ö Goroisa Lowalangi andrö sifao fa’ahele dödö? Hadia no tataögö wa’afökhö andrö ba lala wa’aurida? Hadia no ta’omasi’ö dalifusöda irege tola tabelegö ita salahira? Ya lö mamalö so it aba gerönua fa’omasi andrö, ba tabohouni wa’omasida. Amen. (Ditulis oleh Kat. Ingatan Sihura, S.Ag)