LUO KAMI SAFUSI | KAMIS, 17 April 2025 |

 

Fombaso I     : 2 Moz 12:1-8.11-14

Fombaso II    : 1 Kor 11:23-26

Injil                 : Yoh 13:1.4-15

 

Turia Somuso Dödö khö Yesu Keriso nisura Yohane.-

 Me föna gowasa Paska andrö, aboto ba dödö Yesu, wa no irugi inötö aheta Ia ba gulidanö andre, möi Ia khö Nama. No I'omasi'ö dana khöNia ba gulidanö, föna, ba  I'omasi'ö ira irugi gamozua. Me manga ira, maoso Yesu ba ngai gö, Ibokai mbaruNia sebua Iböbö lembe löwilöwiNia. Ilau nidanö ba naha wanasa, Ibörögö isasai gahe ndra nifahaNia ba I'osi lembe andrö, ni'olembeNia. Me irugi Zimoni Fetero, imane Fetero khö Yesu: "Ya'ugö zanasai ahegu So'aya ?" Itema linia Yesu, Imane khönia: "Lö aboto ba dödöu iada'a hadia nilauGu, ba hiza, aboto ba dödöu dania." Imane khöNia Fetero : "Lö irai utehegö, wa Ösasai gahegu." Itema liNia Yesu Imane: "Na lö Usasai'ö, lö si faböbö khöGu ndra'ugö." Imane khöNia Simoni Fetero: "Na simanö, So'aya, böi ha ahegu Ösasai : tanga awö högö göi." Imane khönia Yesu: "No tehaogö mboto niha si no mondri.Lö moguna tesasai ia sa'ae; ha ahe zoguna nisasai. No muhaogö ami andre, ba lö dozi."  Noa sa I'ila Yesu, haniha zi manga mböliNia. Da'ö mbörö Iŵa'ö: "Lö dozi muhaogö ami." Me no aefa Isasai gahera Yesu, ifuli I'obaru mbaruNia ba dumadao Ia, Imane khöra: "Hadia, no aboto ba dödömi nilauGu khömi andrö mege? Mibe'e töiGu Guru ba So'aya. Si sökhi na miŵa'ö da'ö, börö me duhu. Na no Usasai gahemi, Ya'odo andre, So'aya ya'ami ba Guru khömi, mo'ömö göi ami, faoma misasai gahe nawömi. Ube'e dumaduma andre khömi, ena'ö göi milau simane nilaugu khömi.-        

Simanö duria somuso dödö khö Zo'aya ya'ita, Yesu Keriso.

 

FE’AMÖI ENONI

Ba zisambua omo, so samösa nama ba zisambua ngambatö, no mudadao ia ba falefale nomo ba zi tanö owi. Ba wa’owökhi dödönia, muhede ia khö nononia ono matua wangai önia idanö. Me irongo ono matua, i’andrö khö nakhinia ono alawe wangai idanö andrö me manuranura ia. Ono alawe andrö göi ifatohu wangandrö khö ninania me no arörö göi ia wamaigi hpnia. Ina andrö si so ba zitambai nomo wangokhoi’ö nukha, mu’ao ia khö nama ndraono ba wangai khönia idanö andrö. Me irongo da’ö ama, ifazawa ia möi ia wangai idanö ba galas, awena ibe’e khö nina ndraono, ba ifuli ia wedadao ba falefale. Ihalö idanö andrö ina, ibe’e khö nononia alawe. Ono alawe ibe’e khö ga’ania ono matua, ba awena onomatua zame’e khö namania ba falefale. Me no ibadu idanö andrö amania, tehasu ia imane, hadia tenga idanö andre nihalögu mege? Ifahasu ia, ba maigi samösa ia.

Salua andre yawa, no salua ba ginötö sibohou andre. Alio sibai niha ba wangoni ba hiza ba we’amöi enoni andrö abua sibai. Ama si no högö ba wongambatö, ba gafuriatania, ni’oninia megeno, ifuli i’oni ia samösa. Fanofu khöda zamösana hadia ta’olohia’ö wolau simane.

Bongi andre ba wangowasini luo kami safusi ma bongi fatua lö zumaha sebua, tatörö tödöda Yesu sanasai ahe ndra nifaha’ö-Nia; ba fangohonogöigö-Nia fatomesa ni’amoni’ö, ma sasese tatötöi ia Ekaristi. Ba wangohonogöigö sidua ngawalö andre, terahugö i aba zi sambua tuho ya’ia da’ö “Fe’amöi Enoni”.

Fe’amö Yesu tobali enoni, ilau sifao fa’ahele dodo. Fa’ahele dödö nilau Yesu andrö ibörögö ba wangai-Nia halöwö wondrege zawuyu andrö, yaia wanasa ahe. Fanasai-Nia ahe ndra nifaha’ö andrö, tenga ha börö ena’ö te’ehao ira. Bahiza Ifalua da’ö Yesu ena’ö fefu ndra nifaha’ö andrö göi faoma la’ehaogö nawöra ba faoma möi ira ngoningoni nawöra sifao fa’ahele dödö. Da’e duho nirongoda andrö ba wombaso Turia Somuso Dödö.

Faosatö sidua nifalua Yesu andrö ba ya’ia wangohonogöigö Ekaristi. Fangohonogöigö Ekaristi andrö no famaedo wame’enia boto-Nia; tefera ena’ö aduwa Ndro-Nia tobali fanasai noso niha, ba teboboto Mboto-Nia andrö tobali ö noso fohöli niha. Da’e nifo’amaedola nono mbiribiri andrö bakha ba wombaso si sara. Ena’ö tola ta’erönusi da’ö fefu irugi mane ma’ökhö, tatörö tödöda ba khalakhala roti ba agu andrö nifasömba’ö gere.

Ba gafuriatania, hadia no göi möi ita enoni sahele tödö andrö? Ma hatöi khöda “enoni zato”? Yesu zame’e dumaduma khöda ba da ta’olohia’ö wolau-Nia. Amen. (Ditulis oleh Kat. Ingatan Sihura, S.Ag)