Luo Migu Föna Paskah Si – 4 | Minggu, 30 Maret 2025 |

 

(Sumber foto:google.com)

Luo Migu Föna Paskah Si – 4

Fombaso I     : Yosua 5: 9a. 10 - 12

Fombaso II    : 2 Korindro 5: 17 - 21

Injil                 : Luka 15: 1 - 3, 11 - 32

 

Turia Somuso Dödö khö Yesu Keriso nisura Luka

Me luo da'ö, ato niha sangozara beo awö niha bö'ö nifotöi sebua horö zangondrasi Yesu ba wamondrondrongo huhuoNia. Me la'ila da'ö ira Farizai'o ba ira sangila amakhoita, anuzu dödöra, lamane : "Hiza, Itema niha si lö sökhi Niha andre ba manga Ia awöra." Börö da'ö Ilau khöra gamaedola Yesu, Imane : "So samösa niha si so ono matua, darua. Imane siakhi khö namania : "He ama, be'e khögu dana khögu ba haratoda !" Ba ibagibagi harato andrö ba ndraononia si darua. Lö ara furi ö, ifamawa fefu harato nitemania andrö siakhi, awena ilau mofanö ba danö saröu. Ba da'ö ihorigö gefenia andrö ba zi lö boto. Me no ahori hadia ia khönia, itörö lofo sabölöbölö danö andrö, ba ibörögö alua wo'amböta ba zoguna. Möi ia mu'olembai samösa niha ba danö andrö, manga gazi. Ifatenge ia niha andrö wokubaloi bawi ba mbenua. Omasi ia ifo'ösi dalunia lölö mbanio, ö mbawi, ba samösa lö same'e khönia. Awena maniasa ia, imane : "Ha wa'ato zohalöŵö khö namagu, si lö ambö ö, ba ya'o, arakhagö tekiko ndra'o wa'olofo ba da'e. Mofanödo, möido khö namagu ba umane khönia : He ama, no ufazökhi horö föna Lowalangi ba tanö fönau. Lö sa'ae sinangea ndra'o, latötöi ndra'o onou. Akha hulö zohalöŵö khöu ndra'o, ama." Mofanö ia, mangawuli khö namania. Me aröu ia nasa moroi ba nomo, no i'ila ia amania ba ahakhö dödönia, fagohi ia, italagui mbagi, fa'ago bawa ia khönia. Ba imane khönia ono : "He ama, no ufazökhi horö föna Lowalangi ba tanö fönau. Lö sinangea sa'ae ndra'o latötöi ndra'o onou." Ikaoni ndra sohalöŵö khönia amania, imane : "Mi'alio'ö mihalö nukha sabölö sökhi andrö ba mibe'e khönia. Mibe'e laeduru ba durunia ba badagahe ba gahenia. Awena mihalö nono zaŵi satabö ba mitaba. Talau manga ba ta'omusoi'ö dödöda, börö me no mate nonogu andre ba no ifuli auri iada'e.  No taya ia, ba hiza, no musöndra mangawuli." Ba ibörögö la'omusoi'ö dödöra. Gasagasa da'ö, no so ba nowi nono sia'a. Me mangawuli ia, me no ahatö ia ba nomo, ba irongo wanunö ba folaya. Ikaoni samösa zohalöŵö khöra, isofu khönia : "Hadia da'ö ba nomo ?" Imane sohalöŵö andrö : "No mangawuli nakhiu, ba no ifataba'ö nono zaŵi sabölö atabö amau, börö me no ifuli isöndra nakhiu, me lö si göna ia hadia ia." Mofönu sibai nono sia'a andrö, irege lö edöna möi ia yomo. Börö da'ö möi baero namania, muhedehede ia khönia. Ba imane khö namania : "Hiza, no ha'uga fakhe mohalöŵö ndra'o khöu, ama, ba lö irai ufadaö niŵa'öu. Ba khögu lö irai öbe sara nono mbiribiri, ena'ö u'omusoi'ö dödögu, si fao ira si fahuwu khögu. Ba me no so nonou andrö, si no mangohori haratomö si fao ira alawe sohoröhorö, no öfataba'ö khönia nono zaŵi satabö." Itema linia amania, imane : "He onogu, si lö tebulö fao khögu ndra'ugö, ba fefu zi so khögu ba no khöu. Ba hiza, lö tola lö'ö talau manga ba ta'omusoi'ö dödöda, me akhiu si no mate andrö, no ifuli auri; no taya ia, ba no musöndra mangawuli."-

Simanö duria somuso dödö khö Zo'aya ya'ita, Yesu Keriso.-

NA SO WAMALALINI ERA’ERA BA TESÖNDRA WANGEFA

Samuza ma’ökhö, so samösa zangetu’ö huku (Hakim), sedöna mangasiwai lala halöwönia börö me no irugi inötö wa fasiu ia. Hakim andre no tehöngö sibai börö wa’atulönia ba wangetu’ö huku niha sifasala. Ba wa fasiunia andrö, tetehegö khönia wanörö ba gurunga, ba wangefa’ö samösa niha sifasala, silau dödönia. Me ofeta ia ba gurunga, te’owuloi khönia fefu niha gurunga, ba ibörögö wangombakha wa edöna ia wangefasi samösa niha nikuru ba nahia andre. Andrö isofu khöra imane: “Haniha ba gotaluami andre zinangea ni’efasi? Ba hadia mbörö wa sinangea ia ni’efasi?” Ato niha samezawa tang aba same’e fanema li ba wanofu andrö. So zanguma’ö wa niböbögö khönia walahuku ia, so zanguma’ö: sindruhunia tenga i’odödögö, ba tanöbö’önia na. Ba wamondrongo fefu niwa’öra andrö ba ifehekhe manö mbo’önia hakim andrö.

Ba hiza ba dalu wahuhuosa andrö, so samösa niha si lö nininini. Isofu khönia hakim: “He talifusö, hana lö öbe’e yawa dangamö? Hadia lö omasi’ö aefa moroi ba gurunga andre?” Itema linia niha andrö: “He ama, no sinangea ndra’o nihuku börö horögu andrö. Sökhi na ha ya’ira zaefa, he ha ba nahia andre ubu’a zulö horö nifaluagu andrö”. I’anema’ö ihalö danga niha andrö, hakim andrö, ba imane ba safi gurunga: “Da’e niha sinangea u’efasi”. Me lasofu khönia hadia mbörö, imane hakim andrö: “Niha saboto ba dödö horö, ba falukha ia wangefa”.

Bakha ba wombaso siföföna tarongo wehede Zo’aya khö Yosua ba wangeheta khöra fa’aila wa no sawuyu. Tandra wa’aheta khöra wa’aila ba wangosawuyu andrö ba lalau gowasa paska, lalau manga sami ba wanaba ono mbiribiri satabö. Tandra andre ba no fangefa’ö moroi ba gawalö wangosawuyu ba fe’amöi tobali niha sibohou. Itehegö khöra So’aya wolau gowasa paskah andrö börö me I’ila so khöra wamalalini era’era So’aya.

Bakha ba wombaso sidua, tarongo wamaha’ö Waulo andrö ba mbanua Gorindro. Famaha’ö Waulo andrö so’amakhaita ba wa’atobali niha sibohou fefu niha si no hasambua ba khö Keriso. Fahasambua ba khö Keriso andrö tabörögö ba wanemada Fanasa Ni’amoni’ö. Ba wanasa ni’amoni’ö andrö tesasai ita moroi ba ngawalö horö ba tesou ita tobali niha sibohou.

Bakha ba Duria Somuso Dödö andrö nisura Luka, edöna I’ombakha’ö khöda hewisa gamuata nono selungu andrö. Ono selungu andrö ba no sangohori okhöta. Ba hiza börö me so khönia wamalilini era’era andrö ba lö mamalö isöndra wa’ahakhö dödö namania. Ba wamalalininia era’erania, ba da’ö isöndra wa’auri sibohou.

Ba luo migu föna paskah si öfa andre, idönia’ö ita Gereja ena’ö ta’erönusi lala wa’aurida zamösana ba wamati; ya’ia da’ö: “na so khöda wamalalini era’era ba tasöndra wangefa”. Ba wamobörö ibe’e khöda dumaduma Ndraono Gizara’eli andrö sedöna mamalalini era’era. Ba wamalalini era’erara andrö itehegö teheta ira moroi ba wa’aila ba fangosawuyu andrö. Famalalini era’era andrö ena’ö si’oroi dödö ba wamalua ya’ia. Ono siakhi andrö nifotöi selungu andrö dumadumania.

Ba wa’auri si’ero ma’ökhö, fasalata ba famalua si fatimba ba hörö Lowalangi, asese lö aboto ba dödöda. Ba hiza börö wamati ba fahasambua ba wanasa ni’amoni’ö andrö, sifao ita ba wa’amate ba khö Keriso, ba sifao ita göi ba wemaosonia andrö solakhömi. Inötö Föna paska andre no inötö sisökhi ba wangahatö’ö mangawuli ba khö Lowalangi ba wamalalini era’era. Na si’oroi dödö wamalalini era’era, ba lö mamalö tesöndra wangefa. Ba gafuriata, amaedola zatua zanguma’ö: “na si’oroi dödö tö wowengu ba na si’oroi dödö tö we’e, ba alua yawa dawa hörö ana’ate. Ba na tenga tö si’oroi dödö tö wowengu, ba na tenga tö si’oroi dödö tö we’e, ba alua yawa nidanö hörö mane sibai gitö gae”. Simane niha ni’efa’ö andrö, börö wa’aboto ba dödönia zi fasala ia ba i’ila wa tenga sinangea ia, ba da’ö isöndra wangefa horönia andrö. Yafaoma itolo ita Lowalangi. Amen. (Ditulis oleh Kat. Ingatan Sihura, S.Ag)