Luo Migu Föna Paskah Si – 3 | Minggu, 23 Maret 2025 |

 

(Sumber foto:google.com)

Luo Migu Föna Paskah Si – 3

Fombaso I     : 2 Moz 3: 1-8a. 13-15

Fombaso II    : 1 Kor 10: 1-7a. 10-12

Injil                 : Luk 13: 1-9

INJIL

Turia Somuso Dödö khö Yesu Keriso nisura Luka

Me luo da'ö, so niha sanutunö khö Yesu sanandrösa ba niha Galilaia, nifabunu'ö Wilato, me lafasömba'ö wasömbata ba nomo Lowalangi, irege faruka ndrora ba ndro wasömbata andrö khöra. Imane khöra Yesu : "Hadia miwai da'ö dandra, wa abölö ebua horö niha Galilaia andrö moroi ba horö niha Galilaia bö'ö, me no göna ira da'ö ? Tenga simanö. Uŵa'ö khömi : Na lö mifalalini gera'erami sa, ba oi simanö wa'atekikomi dania. Ma si feleŵalu niha andrö, simate ba Ziloa, me ilangögö ira malige. Hadia miwai da'ö dandra, wa abölö ebua horöra moroi ba niha bö'ö, si so ba Yerusalema ? Tenga simanö. Ba Uŵa'ö khömi : Na lö mifalalini gera'erami sa, ba oi simanö wa'atekikomi dania." Ba Iŵa'ö gamaedola andre : "So samösa zokhö töla marafala, nitanö ba kabu nagu khönia. Möi niha andrö mangalui bua marafala andrö, ba lö nisöndrania. Andrö imane ba zohalöŵö ba kabu nagu : Hiza, no tölu fakhe ae möido ba da'e wangalui bua marafala andrö, ba lö nisöndragu. Obö döla geu andrö ! Hadia guna so ia ba da'e?  Alimagö danö khönia!  Imane sohalöŵö ba kabu andrö : He ama, akha auri döfi tö geu andre. Da'ufasui wogao tanö ba ulölö mbörönia. Ma'atö mowua ia ba ndröfia. Ba na lö'ö, hana na öfa'obö'ö ia."

Erönua:

LOWALANGI ANDRÖ BA NO FA’OMASI BA NIHA SAMALALINI ERA’ERA

Samuza maökhö, so samösa razo safaito sangila wa arakhagö mate ia. So datölu khönia ndraono sitola tobali sanohugö dadaoma wa’arazo andrö khönia. Ena’ö atulö wanuyu salahinia andrö, i’andrö ba ndraononia, “Haniha zoya mamaelungu niha, da’ö dania zitobali sanohugö dadaoma wa’arazonia”. Mofanö nono sia’a möi ia mamaelungu niha, b aero falukha ia ba niha, iwa’ö ba niha: “Fayafaya manö wa so Lowalangi andrö!” Ato niha sanimbagö ya’ia me so wa’aboto ba dödö ba niha wa so Lowalangi. Ba gafuriata, mangawuli manö ia sifao fa’abu dödö. Simanö göi nono tatalu, mangawuli manö sifao fa’abu dödö me ero falukha ia ba niha da’ö niwa’önia, “Ami wamalua horö!” Lö faduhu dödö niha da’ö me aboto ba dödö niha wa horö andrö zolohe niha ba wa’amate. Fabö’ö nilau nono siakhi, ero falukha ia ba niha samati isofu: “Heza lumalö’ö?” Ato niha sanema, “möi ba gosali” ma “möi ba sekola wangandrö”, irege iwa’ö: “Ah, Sokhi sibai lagumi”. Hiza, aefa wanofu da’ö imane: “hadia so zui mahemolu wangandrö ba gosali ma ba sekola wangandrö andrö?” Me latema wehedenia andrö ira niha samati lawa’ö “so”, imane khöra: “aine ua, fahuhuo ita sabata. So satö zui mahemolu wangandrö andrö”.  Ba gafuriata, ato niha selungu me lamane tödöra “fakhamö, so zui satö mahemolu” ma lawa’ö: “dania zui”. Ba da’e arörö dödö niha ba wanguma’ö “dania” olifu ira wamati irege me irugi inötö zamösana, olifu ira wamalalini era’era.

Bakha ba wombaso sisara andre nihalö moroi ba zura Moze si dua, tefarongogö hewisa gangi’ilata andrö ni’ila Moze. So galitö ba hiza lö akhozi. Ba meno irugi zinga nahia andrö Moze, awena aboto ba dödönia wa Lowalangi sogaoni ya’ia da’ö. Ba da’e sindruhu I’oroma’ö haniha zindruhunia ia Lowalangi andrö. Lowalangi andrö ba no Yahwe, Lowalangi Gaberahamo, Lowalangi Giza’aki, ba Lowalangi Yakobo. Lowalangi andrö göi ba no Lowalangi sahakhötödö samondrongo ngaröngarö dödö soiNia ba sangalui lala ba wangeheta soiNia moroi ba wa’abu dödö andrö.

Fehede Waulo andrö bakha ba wombaso sidua, sindruhu te’oroma’ö hewisa wolumö’ö Lowalangi Iraono Gizara’eli andrö. Fanöröra asi zukhu ba folumö’ö lawuo andrö no sambua fanasa ba wahasambua wefao khö Moze. Fanöröra tanö simate andrö göi, sindruhunia no sambua tandra ba wamalalini era’era ba fanasa andrö no sambua ndrela wamohouni. Fefu zalua andrö sindruhunia no tobali tandra wa’ahakhö dödö Lowalangi ba soiNia samalalini era’era, hewa’ae ba gafuriata oya niha si lö nasa faduhu tödö khö Lowalangi.

Amaedola Yesu andrö bakha ba wombaso turia somuso dödö sindruhunia no tola tobali ösi wombaso turia somuso dödö andrö. Hadia mbörö? Hewa’ae hawa’ebua horö niha, lö manö nasa tola mulawa wa’ebua wa’ahakhö dödö Lowalangi andrö. Amaedola zohalöwö andrö solaunasa obula ba mbörö zinanö andrö ena’ö mowua, no sambua tandra wa lö mamalö ibe’e nasa ginötö ba wamalalini era’era andrö Lowalangi ba niha gulidanö.

Sitölu ngawua wombaso andre edöna i’oroma’ö wa Lowalangi andrö ba no fa’omasi. Fa’omasi Lowalangi andrö ya’ia wa’ahakhö dödö si lö mo’aetufa ba niha samalalini era’era. Ba wamalalini era’era andrö, ni’anemai’ö ba böi simane ba dumaduma andrö sanguma’ö “dania zui”. Böi so wa’arörö dödö me lö ta’ila ginötö abdrö. Fatua so ginötö mu’anemai’ö wamalua famalalini era’era andrö. Ba gafuriata, fanörö inötö föna paskah andre no amaedola wanörö tanö simate ba wamalalini era’era. Ba wanörö tanö simate andrö sindruhu böi mangiwa dödö wa Lowalangi andrö lö faröi ia ba wolumö’ö. Ba hiza ya’aro dödö wa dozi samalalini era’era, isödra wa’ahakhö dödö Lowalangi me Lowalangi andrö no fondrege zahakhötödö. Ba wa’ahakhö dödöNia andrö lafotöi ia “LOWALANGI ANDRÖ BA NO FA’OMASI”. (Ditulis oleh Kat. Ingatan Sihura, S.Ag)